Qırımnıñ Rusiye tarafından askeriyleştirilüvi – yarımadanı işğalden qurtaruv platformasınıñ esas meselelerinden biridir, dep tarif etti Ukraina Tış işler naziriniñ birinci muavini Emine Ceppar Qırım.Aqiqatqa.
«Qayd etmek istegenim – Qırımnıñ askeriyleştirilüvini yarımada işğaliniñ esas aqibetlerinden biri olaraq tanıtmağa planlaştıramız», – dep ayttı Ceppar.
Onıñ bildirgenine köre, Rusiyeniñ Qırımdaki vazifesi – turizm inkişafı degil, arbiy baza quruluvıdır.
«Alınğan tedbirler, meselâ, yol, bağça quruluvı – ordu içün, Qırımğa ketirilgen arbiylerniñ balaları içündir», – dedi Ceppar.
Onıñ qayd etkenine köre, Qırımnı işğalden qurtaruv platforması farqlı seviyelerde Qırımnen bağlı bütün tedbirlerden ibarettir.
Cepparnıñ aytqanına köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar.
Ukraina prezidenti Volodımır Zelenskıy BM Baş Assambleyasınıñ 75-inci sessiyasınıñ umumiy munaqaşalarında çıqışta bulundı. O, Qırımda insan aqları vaziyetine dair yañı qararğa qol tutmağa ve yarımadanı işğalden qurtaruv halqara Qırım platformasınıñ qurulışında iştirak etmege çağırdı.
Ukraina Tış işler naziri Dmıtro Kuleba, onıñ nazirliginde Volodımır Zelenskıy içün Qırımnı işğalden qurtaruv muzakereleri içün halqara platformasını quruv teklifi azır, dep bildirgen edi.
Bundan evel Kulebanıñ qayd etkenine köre, Ukraina, Qırımnı işğalden qurtaruv halqara platformasınıñ liderlerinden biri Poloniya olacaq, dek bekley. O, Qırımnı işğalden qurtaruv meselesi boyunca halqara meydançıq işinde Rusiyeni körmey, dep aytqan edi.
Daa evel Ukraina Tış işler nazirligi Qırımdaki Rusiye akimiyetine arbiy obyektlerniñ ve arbiy-sınayı kompleksi müessiseleriniñ tez inkişafına suv yetmey, dep bildirdi.
