Link açıqlığı

Saatnıñ esas haberi

«Asker» vekili Arifova Qırımdaki tintüv aqqında: «Ukraina vatandaşım ve memleketimni qorçalayım»


Evelina Arifova. Arhiv fotoresimi
Evelina Arifova. Arhiv fotoresimi

«Asker» cemaat birleşmesiniñ vekili Evelina Arifovanıñ fikirince, Qırımda ana-babasınıñ evinde keçirilgen tintüv onıñ vatandaş baqışlarınen bağlı. Bu aqta o, yanvarniñ 23-nde Qırım.Aqiqatqa tarif etti.

«Tintüvler aqqında kütleviy haber vastalarından eşittim. Elbette, ana-babamnı tüşünem, amma olarnıñ menim faaliyetime iç bir alâqası yoq. Olar (FSB – QA) saba sürip kirdi, tintüv keçirdi. Kütleviy haber vastalarında oquğanlarıma köre, olar celpname bergenler, meni cinayet işlegenimde, qanunsız silâlı birleşmede iştira etkenimde qabaatlaylar. Men cemaat birleşmesiniñ azası olam ve silânen iç bir alâqam yoq. Ukraina vatandaşım ve memleketimni qorçalayım. Ana-babamnıñ bunıñnen iç bir alâqası yoq. FSB qırımtatarlarnı «qorquzıp», Qırımdan «çıqartacaq ola», – dedi Arifova.

Onıñ aytqanına köre, o, 2014 senesinden soñ Qırımdan esas Ukrainağa ketip, ana-babasınen bağ tutmay.

Saba haber etilgenine köre, Aqmescitteki Borçoqraq (Fontanı) mikrorayonınıñ Emel soqağında tintüv keçirilgen edi. Daa soñra belli oldı ki, Qırımdaki Rusiye FSBsi hadimleri «Asker» cemaat birleşmesiniñ komandan vekili Evelina Arifovanıñ ana-babası yaşağan evde tintüv keçirdi.

Rusiye FSBsiniñ hadimleri Qırımda «Noman Çelebicihan qanunsız ukrain batalyonınıñ» eki iştirakçisiniñ evinde tintüv keçire, dep bildirdi Rusiye kütleviy haber vastaları yanvarniñ 23-nde saba.

2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.

Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.

«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

XS
SM
MD
LG