Avgustnıñ 7-nde Eski Qırımda 30 yaşında qırımtatarı Asan Zekeryayevniñ evinde tintüv keçirildi. Bundan soñ onı belli olmağan yerge alıp ketkenler, dep bildire «Qırım birdemligi» cemaat birleşmesi.
Qırımlı evli ve eki çağına yetmegen balası bar – Muhammad (4 yaşında) ve Esma (2,5 yaşında). Tintüv vaqtında evde bir özü edi.
Soy-sopları Rusiye polisine ariza berdi.
«1993 senesi doğma kiyevim Zekeryayev Asan Rasimoviç hırsızlanğanını bildirmek isteyim. Evine sürip kireler, dep mesac yolladı – qapuğa pek urğanlar. Biz kelgende endi yoq edi. İç işler nazirligine insan hırsızlanğanını bildirdik», – dep aytıla haberde.
Rusiye uquq qoruyıcıları Zekeryayevni ilk sefer tutmay. 2022 senesi yanvar ayında Aqmescitte polis hadimleri oña qarşı qırımlı musulmanlarnıñ davası baqılğan mahkeme binası ögünde olğanı içün protokol tizgen edi. O vaqıt 14 kün memuriy apiste tutuldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
