Link açıqlığı

Saatnıñ esas haberi

Sabıq siyasiy mabüs Asan Çapuhnıñ evinde keçirilgen tintüvler Rusiye tarafdarı bloger Talipovnıñ çaquvı esasında keçirildi – Polozov


Nikolay Polozov
Nikolay Polozov

Advokat ve aq qorçalayıcı Nikolay Polozov Koreizde sabıq siyasiy mabüs Asan Çapuhnıñ evinde keçirilgen tintüvni ve tutulğan ömür arqadaşı Asiye Çapuhnıñ tutuluvını izaatladı.

Polozovnıñ aytqanına köre, Rusiye uquq qoruyıcıları Rusiye tarafdarı qırımlı bloger Aleksandr Talipovnıñ çaquvına köre areket etti.

«Bugün uquq qoruyıcılar kene Asan ağanıñ evine keldi. Ebet, çaquv esasında. Qırımda bir bloger Talipov, onıñ fikirince, işanılmaycaq şahıslarnı çaqa eken. Talipov imperiya ücümcileriniñ göñülli yardımcısı olsa, eski bir imperiya adetini unutmamalı – «çaqqan birinci qamçını ala». Asan ağa ve ömür arqadaşına sağlıq ve quvet!», – dep yazdı Polozov Facebook saifesinde.

Talipov da Telegram kanalında Asan Çapuhnıñ evinde keçirilgen tintüvni ve ömür arqadaşınıñ tululuvını yazdı.

«Yazğanlarımdan soñ Qırımda kene ağlav, tintüv ve tutuvlar başlanacaq», – dep yazdı Talipov.

Oktâbrniñ 14-nde işğal etilgen Qırımnıñ Koreiz qasabasında sabıq siyasiy mabüs Asan Çapuhnıñ evini Rusiye uquq qoruyıcıları tintti, ömür arqadaşı Asiye Çapuh tutuldı. Oña qarşı Rusiye Memuriy uquq bozuvları kodeksiniñ 20.3.2 maddesine (Rusiye Federatsiyasınıñ Silâlı quvetlerini itibardan tüşürgen açıq areketler) ve 20.1 maddesine (Kiçik yaramazlıq) istinaden eki memuriy protokol tizdi.

Asan Çapuh «Veciye Kaşka davasınıñ» mabüsi olıp, 15 ay devamında Aqmescit SİZOsında tutuldı, amma onı ve diger dava mabüslerini ev apsine alğanlar – üküm müddeti bitkenine qadar.

2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etkeninde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olacaq. Asan Çapuh 3,5 yılğa şartlı olaraq üküm etildi, onıñ da sınav müddeti 3 yıl oldı.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

«Veciye Kaşka davası»

2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.

Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.

Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.

2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.

Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG