1-inci tibbiy batalyon komandanı, qırımtatar faali Asan Çaruhov Ukrayina Silâlı quvetleriniñ baş komandanı Mıhaylo Drapatıynıñ buyruğınen tibbiy küçlerniñ yañı komandanı Kostântın Ğumenükniñ muavini olaraq tayin etildi. Bu aqta "Prâmıy" ukrayin telekanalı haber ete.
Çaruhov Qırım Rusiye tarafından işğal etilgende yarımada parlamenti ögünde narazılıqlarda iştirak etti. 2018 senesi Ukrayina Sağlıq nazirligi tibbiy hızmet müdirligine acele tibbiy yardım berilüvi ekspert gruppasınıñ devlet eksperti vazifesine ğalip olaraq saylandı. Sağlıq nazirliginde reber ekspert vazifelerinde oldı, mahsus ve yüksek tibbiy yardım meseleleri ekspert gruppalarınıñ reberi edi, nazirlikniñ müdirliklerinden biriniñ baş müdir vazifelerini eda etken edi.
V derece Yaroslav Mudrıy nişanınen taqdirlendi. Ukrayina prezidenti Volodımır Zelenskıy "Ukrayinanıñ milliy efsanesi" devlet mukâfatınen qayd etti. Büyük istilâ başlağan soñ Çaruhov arbiy tibbiy hızmetke qoşulıp, Ukrayina arbiyleriniñ ayatlarını qurtarmağa tırıştı. 2025 senesi cebeniñ tahminen 100 km uzunlığındaki bir qısımda tibbiy yardımnı temin etken 1-inci ayrı tibbiy batalyon yolbaşçısı oldı.