Rusiye apsinde tutulğan qırımlı faal Asan Ahtemovnıñ tişleri ve közleri zarar köre, dep haber ete «Qırım birdemligi» ömür arqadaşı Repika Ahtemovanıñ malümatına esaslanıp.
Onıñ aytqanına köre, qırımlı özü baqmağa tırışa, çünki «tibbiy yardım aman-aman yoq».
«Aş ve vitaminler tam olmağanı içün tişler zarar köre. Boş vaqtı olğanda çoq oquy ve yahşı ışıq olmağanından közleri yaramay körip başladı. Közlerini çalıştırmağa tırışa, amma kene de közleri yaramay körgenini is ete. Ebet, apishane şaraitleri sert. Zor olsa da, aqları içün pek sıq küreşmege mecbur oldı», – dep tarif etti Ahmetova.
Aftada altı kün Asan sarğılıq tsehinde çalışa. Oqumaqtan ğayrı kelgen mektüplerge cevap bere, dep tarif etti faaller.
Rusiye Asan Ahtemovnı insanlar gruppası yapqan ve büyük zarar ketirgen diversiyada, patlayıcı cihazlarnı qanunsız satın aluv, saqlav, satuvında ve qaçaqçılığında qabaatladı.
2022 senesi Ahtemov 15 yıl sert rejimli koloniyada qalmasına üküm etildi, 500 biñ ruble para cezası berildi ve 1 yılğa azatlığı sıñırlandı. Şimdi o, Vladimirskiy tsentral olaraq belli Vladimir vilâyetiniñ №2 apishanesinde tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
