Rusiye tarafından 15 yılğa üküm etilgen qırımlı faal Asan Ahtemov koloniyada közleri zayıfladı, dep şikâyet etti. Bu aqta ömür arqadaşı Repika Ahtemova iyünniñ 17-nde Rusiyeniñ Arhangelsk vilâyetiniñ İK-5 koloniyasında aqayınen körüşken soñ içtimaiy ağlarda bildirdi.
Qırımtatarınıñ aytqanına köre, bir yıl içinde közleri pek yaramay körip başladı. «10-15 daqqa oqusa, kitapta sözler qarışa, közleri ağıra, yaşlana ve qızara, tek bir qaç saattan soñ oqumağa devam etmek mümkün», – dep yazdı Ahtemova.
Faal 15 daqqadan ziyade oturmağa imkân bermegen sırt ve tiz ağrıları aqqında tarif etti.
«Tibbiy teşkerüv talap etmek pek qıyın, amma Asan tırışa, arizalar yaza, imkân olsa – sağlıq vaziyetini ekimge ayta. Bu imkân pek-pek siyrek ola, ne yazıq ki», – dep qoştı qırımlınıñ ömür arqadaşı.
Rusiye Asan Ahtemovnı şahıslar gruppası erkânında ve zararğa ketirgen diversiya yapqanında, patlayıcı maddelerni qanunsız aluv, saqlav ve satuvda ve olarnıñ kontrabandasında qabaatladı.
2022 senesi Ahtemov 15 yıl sert rejimli koloniyada qalmasına, 500 biñ ruble para cezasına ve azatlığınıñ 1 yılğa sıñırlanmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
