İşğal altındaki Qırımnıñ «Artek» lagerinde Yañı yılnı 19 memleketten kelgen balalar qarşıladı. Bu aqta lagerniñ matbuat hızmeti bildire.
«Artekte» raatlanğanlar Yañı yılnı bala merkeziniñ Saray meydanında qarşıladı. 18 metrlik narat yanında 19 memleketten kelgen aman-aman eki biñ bala toplaştı. Balalar güzel bir masal kördi, çeşit oyunlarda iştirak etti, 2020 yılına yır ve oyunlarnen kirdi», – dep aytıla haberde.
Dekabrniñ 30-nda haber etilgenine köre, «Artek» lageri qomşu Rusiyeden balalarnı qabul etti. Olar işğal etilgen yarımadağa Keriç köpründen trennen keldi.
İşğalden soñ Kreml kontrolindeki Qırım akimiyeti «Artek» bala lagerini devletleştirip, onı Rusiye mülkine berdi.
Ukraina Tış işler nazirligi UNESCO, ileri halqara teşkilâtlar, dünya toplulığına muracaat etip, «Artekniñ» Rusiye federal mülkine berilmesini takbih etmelerine çağırdı. Nazirlik, 2006 senesi Ukraina ükümeti ve UNESCO arasında imzalanğan añlaşmağa köre, «Artek» Halqara bala merkezi» Ukraina devlet müessisesine UNESCO imayesi altında merkez statusı berildi, dep qayd etti.
2015 senesi aprel ayında Qırım Muhtar Cumhuriyetiniñ prokuraturası Qırımdaki «Artek» halqara bala merkeziniñ «devletleştirilüvi» sebebinden cinaiy dava açtı.
2016 senesi aprel ayında Kyivniñ Obolon mahkemesi «Artek» mülkini tevqif etti.
Rusiyeniñ Qırım işğalinden soñ esas Ukrainada «Artek-Bukovel» bala lageri çalışıp başladı.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.
