«Qırımlı musulmanlar davasınıñ» mabüsi Arsen Abhairovnıñ ömür arqadaşı Rusiye mahkemesine Cezalarnı yerine ketirüv federal hızmetine qarşı aqayını Burâtiya koloniyasından Qırımğa yaqın bir yerge avuştıruv aqqında dava açtı. Bu aqta «Qırım birdemligi» uquqçı Nazim Şeyhmambetovnıñ malümatına esaslanıp yaza.
Al-azırda Arsen Abhairov Burâtiya Cumhuriyetiniñ №8 sert rejimli koloniyada tutula, anda onı bu yıl yanvar ayında Krasnoyarsk ülkesiniñ Yeniseysk apishanesinden etap etkenler.
Azize Abhairova tarif etkenine köre, eki yıl devamında aqayını evine yaqın avuştırsınlar dep, Cezalarnı yerine ketirüv federal hızmetine arizalar berdi, amma onıñ ricası çeşit manaçıqlarnen red etilgen edi. Bir danesi aqayınıñ maddesi «ağır» olğanınen, digeri 2022 senesi fevralniñ 24-nden soñ «orta seviyeli areket» rejimi ilân etilgen regionlarnen bağlı edi, Cezalarnı yerine ketirüv federal hızmeti bu regionlarğa etaplarnı toqtatqan edi.
«Bu qadar uzaq olması qoranta bağlarını qoruv aqqını doza. Birinciden, pek uzaq (Burâtiyadaki İK-8-den Qurman qasabasına qadar 6,7 biñ kilometr bar – QA). Vaqıt çoq kerek – körüşüv aqqını yerine ketirmek içün. Ekinciden, maddiy tarafı körüşüvge barmağa imkân bermey», – dep ayta uquqçı Nazim Şeyhmambetov.
İyünniñ başında berilgen malümatqa köre, Abhairov Krasnoyarsk ülkesiniñ Yeniseysk şeerindeki №2 apishanesinde mahkeme qararındaki hatadan sebep eki buçuq ay yañlışlıqnen yattı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
