«Qırımlı musulmanlar davasının» mabüsi Arsen Abhairov Krasnoyarsk ülkesiniñ Yeniseysk apishanesinden Burâtiya Cumhuriyetiniñ sert rejimli koloniyasına etap etildi. Bu aqta ömür arqadaşı Aziza Abhairova «Qırım birdemligine» bildirdi.
«Arsen yanvarniñ 10-nda «Zonatelekom» apishane bağınen telefon etip bunı bildirdi. Lâkin angi koloniyağa avuştırıla – aytmadı. Umumen Krasnoyarsk apishanesinde eki yıl keçirdi», – dep aytıla haberde.
«Qırım birdemligi» qayd etkenine köre, Rusiye mahkemesi Abhairovnı 13 yılğa azatlıqtan marum etti. İlk eki yılnı tahqiqat izolâtorında keçirgen müddetnen beraber apishanede keçirmek kerek edi. Amma onıñ SİZOdaki müddeti apishane müddeti olaraq sayılmadı, dep aytıla haberde.
Keçken sene sentâbr ayında Abhairovnıñ imayesi mahkeme qararına itiraz bildirmege tırıştı. Qırımlı apishaneni çoqtan terk etip, sert rejimli koloniyada qalmaq kerek edi, dep qayd etti. Lâkin itiraz qabul etilmedi.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
