Mahküm etilgen qırımlı Arsen Abhairovnıñ varis damar hastalığı bar ve tiş ekiminiñ yardımına muhtac, dep bildire Qırım birdemligi.
Ömür arqadaşı Azize Abhairova Krasnodar ülkesindeki Yeniseysk apishanesinde aqayınen körüşken soñ onı tedaviylemeyler, dep bildirdi.
«Onıñ ayaqlarında damarlarında varis bar ve tahqiqat izolâtorlarından berli devam etken mesele – tişler. SİZOda tiş ekimi baqmağanı içün tişler artıq tedaviylenmeycek, tek bir çare bar – çıqarmaq. Çaynağan tişleri qalmağan», – dedi Azize.
Damarlarnıñ vaziyeti koloniyada daa beter oldı. Abhairov tahminen 16 saat ayaqta tura. 2023 senesi fevral ayından berli memuriyet qırımtatarını umumiy rejimge keçirgen olsa da, kameradaki şaraitler deñişmedi: saba altıda turğızalar, aqşam doquzda yatqızalar.
Aziza Abhairovanıñ tarif etkenine köre, bu olarnıñ ekinci körüşüvi edi, üç kün devam etti. Aqayına eki çağına yetmegen balasınen keldi.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
