Rusiyede apiske alınğan «Qırım musulmanları davasınıñ» mabüsi Arsen Abhairov yanvarniñ ortasında Krasnoyarsk ülkesiniñ Yeniseysk şeerindeki apishanege etap etildi. Bu aqta apayı Alize Abhairova bildirdi, dep haber etti «Qırım birdemligi» cemaat birleşmesi.
Qayd etilgenine köre, Yeniseysk apishanesinde Abhairov ükümniñ ilk eki yılını keçirecek.
«Şimdi Yeniseysk apishanesiniñ sert şaraitlerinde buluna: Arsenge apishane urbası berildi, er kün tek 1 saat çıqıp kezmege imkânı bar. Er adamı Qırımnıñ diger siyasiy mabüsleri, hususan «Qurman gruppası» ve ükmüne qarşı itiraz baqılğan «Ekinci Bağçasaray gruppasınıñ» iştirakçileriniñ vaziyetini soradı. Aqay-apay tahminen 15 daqqa laf ettiler», – dep aytıla haberde.
Subetten soñ Abhairovnı Rusiye advokatı Mariya Bogdanova ziyaret etti. Onıñ aytqanına köre, mabüsni tutuv şaraitleri bir qarar.
«Şimdi Arsen Cenübiy okrugınıñ arbiy mahkemesi ve Avropa insan aqları mahkemesine mektüp azırlay – birincisi SİZOda bulunğan vaqtını apishanede olacaq 2 yılı olaraq saysınlar dep, ekincisi ise mabüsniñ yaşağan yerinden uzaq olğanınen bağlıdır. Uquqçı Arsenden minnetdarlıq sözlerini ve qırımtatar halqınıñ bir parçası olğanınen ğururlanğanı aqqında aytqanlarını bildirdi», – dep aytıla haberde.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
