«Armançıq» qırımtatar mecmuasınıñ baş muarriri Ediye Muslimovanıñ tutuluvında zorbalıqnen ğayıp oluvnıñ alâmetleri bar. Bu aqta «KrımSOS» talilcisi Yevğen Yaroşenko bildirdi.
«Ediye Muslimova Aqmescitteki FSB binasında bir buçuq kün tutuldı, işğalciler ise bulunğan yerini aytmay edi. Onıñ tutulmasında zornen ğayıp oluv alâmetleri bar: bir şahısnıñ iradesine qarşı serbestlikten marum etilmek, devlet adamlarınıñ, iç olmağanda, vastasız olaraq, sukünetli razılıq ile celp etilmek, serbestlikten marum etilmeni red etmek ve belli bir insannıñ taqdiri ve bulunğan yeri aqqında haber etmekni red etmek», – dep qayd etti Yaroşenko.
«KrımSOS» yazğanına köre, Rusiye Federatsiyası Bütün şahıslarnı qoruv halqara şartnamesiniñ ve Halqara Ceza Mahkemesiniñ Roma Nizamnamesiniñ iştirakçi devleti olmağanına baqmadan, bu yasaq oña da tesir ete – halqara gumanitar uquq ve Halqara vatandaş ve siyasiy aqlar paktınıñ maddelerine köre.
Muslimova noyabrniñ 21-nde ğayıp oldı, onı üç insan hırsızlap, belli olmağan yerge alıp ketti. Rusiye uquq qoruyıcıları qadınnı 36 saat tuttı. FSB Muslimovağa «olarğa bir signal» kelgeni içün tutqanlarını añlattı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
