60 milliard dollarlıq ABD arbiy yardımınıñ qabul etilmesiniñ keçiktirilüvi Kıyiv içün paalığa tüşti. Bu aqta The Washington Post ile subetleşip, Ukrayina prezidenti Volodımır Zelenskıy bildirdi.
"Biz yarım yılnı ğayıp ettik... Daa vaqıt coyıp olamaymız. Ukrayina firqalar arasında siyasiy mesele olamaz", – dep qayd etti Zelenskıy. O, Kıyivge yardımnıñ tenqitçileriniñ cenkniñ maiyetini añlamağanını qayd etti.
Zelenskıynıñ aytqanına köre, ABD tarafından destekniñ olmaması Ukrayinağa ava mudafaası, "Patriot" raketaları ve 155 milimetrlik artilleriya qurşunlarınıñ olmaması demek olacaq. Silâ qıtlığı şaraitinde ukrayin ordusı yalıñız sıñırlı ücüm tedbirlerini keçire bile, dedi Zelenskıy.
Jurnalistniñ ukrayin uçucısız uçaqlarınıñ Rusiye energetik infrastrukturalarına ücümleri aqqında sualine cevap bergende, prezident, Amerika memurlarınıñ buña cevabı müsbet olmağanını qayd etti. Aynı zamanda, Zelenskıynıñ aytqanına köre, Vaşington Ukrayinanıñ öz silâsını qullanmasını sıñırlap olamay.
"Biz öz uçaqlarımıznı qullandıq. Bunı yapmaq yasaq olğanını kimse aytıp olamay", – dep qayd etti Ukrayina prezidenti. Onıñ qayd etkenine köre, Ukrayina, Rusiyeni aynı fiyatnı tölemege mecbur etüvinen, öz energiya sistemasına Rusiye ücümleriniñ ögüni ala bile.
Evel Zelenskıy, Ukrayina işğal etilgen Qırımdaki nişanlarğa zarar ketirmek içün 300 km mesafelik ATACMS raketalarına muhtac olğanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
