Saq şeerinde aprelniñ 29-nda kündüz yollarda Rusiye arbiy tehnikasınıñ kolonnası areket etti. Bu aqta Qırım.Aqiqat mühbiri haber ete.
Kolonnanıñ erkânında beş raketa tertibatı ve bir qaç arbiy maşina bar edi. Birazdan aynı yoldan Arbiy piyade tehnikası keçti.
Martnıñ soñunda şaatlar Şarqiy Qırımda, hususan – «Tavrida» yolunda, arbiy tehnikanıñ faal areket etkenini bildirgen edi.
Martnıñ 26-nda Qarasuvbazar rayonında dört zırhlı taşıyıcıdan ibaret kolonna ve Arbiy maşina inspektsiyası «Tavrida» yolunda tıqanıqlıqnıñ sebebi olğanlar.
Daa evel haber etilgeni kibi, Qırımda yedinci gvardiya desant-ücüm diviziyasınıñ desant-ücüm ve top alayları ile büyük taktik talimleri başlağan edi.
Rusiye mudafaa naziri Sergey Şoygu martnıñ 11-nde Rusiye ilhaq etilgen Qırımda ordunı quvetleştirdi, dep bildirgen edi. Onıñ aytqanına köre, bu «yarımadanıñ qoruvını ve Rusiyeniñ Qara deñizdeki menfaatlarını temin ete».
2014 senesi Qırım işğal etilgen soñ Rusiye yarımadada arbiy talimlerni muntazam sürette keçirip başladı. Ukraina Baş ştabı Rusiye arbiyleriniñ Qırımda yapqanları qanunsız ola, dep bildire.
