Arbiy maşinalardan sebep, parom keçişi yanında bir çoq saatke sürgen nevbetler tizile

Mızmız hanim

Keriç – Prezident Vladimir Putinniñ avalesine baqmadan akimiyet Keriçteki parom keçişi yanında tizilgen nevbetler meselesini çezip olamay, adamlar nevbetni saatlernen beklemege mecburlar.

«Port Kavkaz» keçiv yerinde paromnı beklerken 500-ge qadar maşina nevbeti toplandı. «İnsanlar saatlernen turğanlarına açuvlanalar, çünki yolcular içün belgilengen «Nikolay Aksenenko» paromına nevbetsiz keçken arbiy tehnika yüklenile».
Novorossiyskten evine qaytqan Aqmescitli Ramis şikâyet etti: «Menim ailem kiçik balanen on saatten ziyade beklemege mecbur oldı. İnsanlar nevbette yorulalar. Parom cedveli anlaşılmağan, iç bir türlü grafik yoq».
Ramis Qırım.Aqiqat mühbirine şunı bildirdi: «Biz keçiş yoluna gece 12-den soñ keldik. Tek eki kiçik «Yeysk» ve «Nikolay Aksenenko» paromları yüre edi. Bizim yanımızdan arbiy maşinalar keçti, bir zamandan soñ nevbette turğanlarnı tek bir parom taşıdı, işte bu vaqıt aldı. Tek kündüz saat 12-de büyük «İonas» paromnı ketirdiler. Bu paromğa mingen soñ, «Nikolay Aksenenko» paromına arbiy maşinalarnı yüklegenlerini kördik».

«Yekâne naqliye müdirligi» mustaqil teşkilâtnıñ (YENM) malümatına köre, parom keçişinde «Port Qavqaz», «Nikolay Aksenenko», «Kerçinskiy 2», ve «Yeysk» gemiler hızmet eteler. Mayıs 23 kününden başlap olarnıñ işine büyük «İonas» paromı qoşuldı, o 160 yengil maşina ve 600-den ziyade yolcunı sığdıra bile.

Evelleri YENM haber etkeni kibi, birinci mayıstan başlap, bütünley yük taşıyıcılarınıñ faaliyeti Keriç keçişinde yasaq etildi, raatlıq mevsimi başlanğanı sebep, «Qırım» ve «Kavkaz» limanları tek yolcularnı taşımaq içün açıq edi. Amma bu malümat kerçekke oşamay.


«Nikolay Aksenenko»dan ğayrı, Qavqaz tarafından arbiy maşinalarnı yaramadağa ketirmek içün arbiy maşinalarnen tolu «Slavânin» paromı közge ilindi. Bu parom AnRussTrans şirketinden kirağa alınıp, birinci kere mayıs 10 künü 2014 senesi Qırım maşinaları areketini yengilleştirmek içün Rusiyeniñ qıtasına naqliye vastalarnı alıp ketken edi. «Slavânin» birden 240 maşinanı sığdıra bile ve ayırı limannı talap ete.

Hatırlatamız, «Yekâne naqliye müdirligi» – Qırım yarımadasında naqliye hızmetlerini eda etken yekâne operatordır. O, Rusiye ükümeti emiri ile, Naqliye Nazirligi tarafından «Olimpiya Oyunlarınıñ Naqliye müdirligi» muhtar ticariy olmağan teşkilât esasında teşkil etildi.