Qırımdaki arbiy bölükte çıqqan atışlı qavğa neticesinde bir arbiy elâk oldı, daa bir kişi hastahanege ketirildi. Bu aqta ASTRA ve BAZA Rusiye telegram kanalları haber etti.
ASTRA menbalarınıñ malümatına köre, qavğa Aqmescit rayonınıñ Anğara (Perevalnoye) köyünde 12676 arbiy bölüginde (Rusiye Qara deñiz flotunıñ 126-ncı yalı mudafaa brigadası – QA) oktâbrniñ 20-nda gece çıqtı.
Berilgen malümatqa köre, kötek neticesinde arbiy İslam Guçayev elâk oldı, diger asker – Albert Abazov – Aqmescitniñ №6 hastahanesine alındı. Çıqqan kötekniñ sebepleri belli degil.
BAZA Aqmescit rayonınıñ sakinleri qapalı obyektten qıçıruv ve ateş eşitip, polis çağırdı, dep bildirdi.
«Bölük reberliginden arbiyler kelgen polis hadimlerine bir şey yoq ve davanı arbiy tahqiqatçılar tahqiq ete, dep ayttı. Yerli hastahanege yaralanğan kişi ketirildi – ekimler ezikleri bar dep, evge yolladı», – dep bildirdi neşir.
Rusiye uquq qoruyıcıları adise aqqında bildirmey.
Sentâbrniñ 21-nde Rusiyede seferberlik ilân etilgen soñ Qırım ve Aqyarnıñ Rusiye akimiyeti askerlikke aluv komissiyaları quruldı, dep bildirdi. Aq qorçalayıcılarnıñ malümatına köre, 5 biñden çoq insan celpname aldı. Aqyarnıñ Rusiye akimiyeti tahminen 2 biñ insan endi Rusiyege ant etti, dep bildirdi. Ukrayına Silâlı quvetleriniñ Baş ştabı olarnı endi Herson vilâyetine ketirdiler, dep bildirdi.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırımda arbiy komissarlıqlar qırımtatarlar toplu yaşağan yerlerde kütleviy şekilde celpnameler bere, dep bildirdi. «Krım SOS» aq qorçalayıcı teşkilâtı qırımtatarlarnıñ seferberligi olarnıñ genotsidine yol aça bile, dep bildirdi.
Ukrayına prezidentiniñ Qırım Muhtar Cumhuriyetindeki temsilciligi Rusiye seferberligine oğrağan qırımlılar içün areket algoritmini derc etti. Rusiye ordusına çağırılmaqtan qurtulmağa istegenler içün «canlı destek» açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
