Rusiyeniñ Federal telükesizlik hızmeti (FSB) Geniçesk rayonında iyülniñ 31-nden itibaren Arabat belini qapata, dep bildirdi. Bu aqta Rusiye kütleviy haber vastaları müessiseniñ matbuat hızmeti bergen malümatqa esaslanıp yaza.
Arabat beline tek acele hızmet hadimleri ve mudafaa ve fevqulâde vaziyetni çezüv işlerini yapqan vatandaşlar kire bilecek, dep haber etile.
«Bu tedbirler başqa bir emir kelgenine qadar devam etecek ve Qırım Cumhuriyetiniñ ealisi, arbiyleri ve Qırım Cumhuriyetinde yerleşken diger obyektlerde telükelerni yoq etmek içün kerek», – dep bildire matbuat hızmeti.
İyünniñ 9-nda ve 10-nda Arabat belinde küçlü patlavlar oldı. Rusiye işğalci memuriyeti «pioner lageri» ve «vaqtınca yerleşüv noqtalarına» raketa darbeleri endirildi, dep bildirdi.
OSINT mütehassısı Bencamin Pittet darbe bu yıl aprel ayında Rusiye prezidenti Vladimir Putin ziyaret etken Rusiye arbiyleriniñ ştabına endirildi, dep tahmin etti. BBC tahqiqatına köre, Kreml yolbaşçısı Geniçeskte edi ve «Brigantina» eski raatlıq bazasını ziyaret etti.
Melitopol şeer yolbaşçısı İvan Fedorov bildirgenine köre, raketa darbesi Rusiye arbiyleri bulunğan raatlıq bazalarına endirildi. Rusiye akimiyeti eki insan elâk oldı, dep bildirdi. Ukrayına akimiyeti bu malümatnı izaatlamağan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
