İyünniñ 8-nde gece Aqyarnıñ Streletskiy körfezinde küçlü patlav oldı, dep haber ete Qırım.Aqiqat mühbiri.
Onıñ aytqanına köre, patlavnıñ küçünden şeerde camlar titregen, onıñ ögünde ise iri kalibrli silâdan atışlar eşitilgen.
Öz nevbetinde Aqyarnıñ rusiyeli yolbaşçısı Mihail Razvojayev, şeer RF arbiyleri tarafından yoq etilgen deñiz dronı tarafından ücüm etilgenini iddia ete.
"Streletskaya körfezi" rayonında eşitilgen yüksek sesler, — bu bizim flotumız ekipajsız katerni yoq etti. Aqyarnıñ qurtaruv hızmetiniñ malümatına köre, grajdanlıq infrastrukturağa zarar ketirilmedi", — dep yazdı Razvojayev telegram-kanalında.
Rusiye Mudafaa nazirligi bu adiseni şimdilik izaatlamadı, ukrayin tarafı da bu haberlerge cevap bermedi.
Şimdilik Razvojayevniñ aytqanlarını alternativ menbalar yardımınen teşkermek mümkün degil.
Keçende Rusiye Mudafaa nazirligi Qara deñizniñ cenübiy-ğarbiy qısmından Qırımğa üç ukrayin deñiz dronınıñ ücüm etkeni ve Rusiye deñiz ve arbiy aviatsiyası tarafından yoq etilgeni aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
