Rusiye kontrolindeki Aqyar yolbaşçısı Mihail Razvojayev bildirdi ki, şeerde yerli vaqıt ile saat 19:30-dan 20:30-ğa qadar Rusiye arbiyleri talimler keçire.
"Şimaliy ve Cenübiy yalı boyu rayonında Qara deñiz flotu, silâ çeşitlerinden ateş açmaqnen beraber, SİZO esaplamalarınıñ talimlerini keçirecek", - dep yazdı Razvojayev öz telegram kanalında.
Daa evel Qırım.Aqiqat mühbiri bildirgenine köre, Aqyarnıñ merkeziy qısmında aqşam avtomat silâdan atışlar eşitildi. Onıñ aytqanına köre, yerli vaqıt ile saat 19:12 ve 19:17 avtoma nevbetler bir daqqa devam etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
