Aqyarnıñ orta mekteplerinde balalar ukrayin tilini ögrenmey. Bu aqta noyabrniñ 20-nde Aqyarnıñ Rusiye tasil ve ilim departamentinde Aqyarnıñ ukrayin milliy-medeniy cemiyeti (UNKOS) yolbaşçısı Oleg Leusnıñ malümat soramasına cevap olaraq bildirdiler, dep yaza L-inform telegram-kanalı.
Faalniñ sualine cevap olaraq, departament müdiriniñ muavini Yelena Andru bildirdi ki, "Ana tili", "Ana tilinde edebiyat oquvı" ve "Ana edebiyatı" dersleri çerçivesinde, oquv planınıñ mecburiy qısmında, Aqyarnıñ umumtasil teşkilâtlarında rus ve qırımtatar tilleri ögrenile, ukrayin tili ögrenilmey. Qayd etmek kerek ki, Aqyarda ukrayin tilini ögrengen mektepten evel tasil, orta zenaat tasil ve qoşma tasil müessiseleri yoq.
2015 senesinden 2018 senesine qadar Aqyar mekteplerinde ukrayin tiliniñ ögrenilüvi ile buña beñzegen vaziyet qayd etilgen edi, amma 2019 senesi fevralniñ 6-nda Aqyarnıñ Rusiye tasil ve ilim departamentiniñ o vaqıttaki müdiri İgor Belozerov UNKOS faalleri ile körüşkende, ukrayin tiline nisbeten Rusiyeniñ siyaseti deñişkenini ve talebelerniñ ana-babaları mekteplerde mütenasip ariza yazsa, ukrayin tili ve edebiyatı Aqyarnıñ orta mekteplerinde birinci sınıflarda fen olaraq ögrenilecek, dep bildirdi. Söz ukrayin tili ve edebiyatını Rusiye dersliklerinden ögrenüv aqqında kete edi.
Resmiy olmağan malümatqa köre, 2019 senesi yaz başında 100-den ziyade Aqyar talebesiniñ ana-babası böyle ariza yazdı.
Oktâbrniñ soñunda Ukrayina prezidentiniñ Qırım Muhtar Cumhuriyetindeki temsilciligi Qırım mekteplerinde 249 bala ukrayin tilinde oquy, bu Qırım yarımadasında oquğanlarnıñ 0,2% teşkil ete, dep bildirdigen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
