Kıyivniñ Şevçenko rayon mahkemesi Qırım ilhaqından soñ Rusiyege keçken Aqyarnıñ istinaf mahkemesiniñ sabıq mahkemecisini mahküm etti. Mahkemeniñ qararı aprelniñ 18-nde çıqarıldı.
Jurnalist taqiqatları merkeziniñ bildirgenine köre, 70 yaşında Ptitsina Valentina İvanovna mahküm etildi. 1993 senesi noyabr ayından 2001 senesi sentâbr ayına qadar Sevastopol şeeriniñ Lenino rayon mahkemesiniñ mahkemecisi olıp çalıştı, 2001 senesi sentâbrniñ 20-nde Ukrayina Yuqarı Şurası tarafından Aqyarnıñ istinaf mahkemesiniñ mahkemecisi vazifesine saylandı.
2013 senesi noyabr ayında Ptitsina istifağa ketmek istedi, amma Qırım Rusiye tarafından zapt etilgen soñ fikrini deñiştirdi ve Rusiye kontrolindeki Aqyar şeer mahkemesinde mahkemeci olıp çalışmağa devam etti.
Kıyivniñ Şevçenko rayon mahkemesi Valentina Ptitsinani devlet hainliginde qabaatlı tanıp, 13 yılğa azatlıqtan marum etüv cezasını berdi. Üküm ğıyabiy şekilde ilân etildi.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından ilhaq etilmesine yardım etkenlerni tapmaq ve mesüliyetke çekmektir". Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
