Rusiyeniñ nezaretinde olğan Aqyarnıñ yolbaşçısı Mihail Razvojayev, bu saba Rusiye Qara deñiz flotunıñ gemisi Qara deñiz üzerinde pilotsız uçqan cihaznı urıp tüşürgenini bildirdi.
"Saba Qara deñiz flotunıñ nevbetçi gemisi deñiz akvatoriyası üzerinde pilotsız uçqan cihaznı urıp tüşürdi. Arbiylerimiz er vaqıt kibi yahşı işlediler", - dep yazdı Razvojayev.
Pilotsız uçqan cihaznıñ kimge ait olmasını Razvojayev bildirmedi.
Evel Qırım.Aqiqat mühbiri Aqyarnıñ merkeziy qısmında yerli vaqıtnen saat 6:50 küçlü patlav yüz bergeni aqqında haber etken edi. Patlav eşitilmezden bir qaç saniye evel raketanıñ uçurtılmasına beñzegen devamlı ses eşitilgen. Mühbirniñ haber etkeni kibi, patlavdan sebep penceredeki camlar tasırdap başlağan.
Ukrayina ресмий шахыслары ве арбийлери шимдилик бу вазиетни даа изаатламадылар.
Aqyarnıñ Rusiye reberleri ve RF Mudafaa nazirligi şimdilik vaziyetni izaatlamadılar.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» atış ve «ava mudafaa sistemalarınıñ işi» aqqında ayta.
Avgustnıñ 16-nda Canköy rayonındaki silâ anbarlarında patlavlar oldı. Rusiye Mudafaa nazirligi buña «diversiya» dep ayttı.
Sentâbrniñ 7-nde Ukrayina Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayina arbiyleriniñ raketa darbelerini tanıdı. Ukrayina mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayina memurınıñ malümatına esaslanıp, Qırımdaki patlavlar «elit Ukrayina arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
