Rusiye nezaretindeki Aqyar başı Mihail Razvojayev, gastroenterit alâmetleri ile şeer hastahanesine sekiz studentniñ barğanını tasdıqladı, amma kütleviy zeerlenüv olmadı, dep bildire.
"Yedi ada tedaviylene. Bir kişini artıq hastahaneden çıqardılar. İnfektsiya hastahanesiniñ hadimleri bütün kerekli analizleni yaptı. Hastalarnıñ episi ekimlerniñ nezareti astındadır, olarğa kerekli tibbiy yardım etile. Rospotrebnadzor bu adiseni tahqiq ete. Birden bildirmege isteyim ki: bu kütleviy zeerlenüv degil. Vaqia mütehassıslarnıñ nezaretindedir. Amma olğan şeyniñ sebeplerini bilmege pek müimdir", - yazdı Razvojayev öz İnstagramında.
Aqyarnıñ rusiyeli şeer akimiyetini atıf etip, yanvarniñ 23-ünde aqşam Qırım matbuatı, Aqyarda Özek energiyası ve sanayı institutınıñ talebelerniñ gastroenterit alâmetlerinen hastahanege qoyulması aqqında haber etti.
