Aqyarnıñ Rusiye akimiyeti yerli aphanelerniñ fiyatlarını teşkere. Aphanede fiyat çoq arttırılğan olsa, para cezası 50 biñ ruble olacaq. Bu aqta şeerniñ Rusiye ükümetiniñ matbuat hızmeti bildire.
«Çoq arttırılsa, Memuriy cinayetler kodeksi çerçivesinde memuriy sanktsiya olaraq para cezası berilecek – 50 biñ ruble. Fiyatlarnıñ artmasına yol bermemek içün şeer aphaneleriniñ monitoringi er vaqıt yapılacaq», – dep ayttı Şeer hocalığı departamentiniñ müdir vazifelerini eda etken Yevgeniy Gorlov.
Qırımda tibbiy maska ve qolçaqlarnı tek aphanelerde satmağa mümkün.
Qırımda aprelniñ 7-nde yañı koronavirus hastası qayd etildi.
Aqyarda şeerde yañı hastalar yoq, dep bildireler, amma 1340 insan yaşağan yerinde közetüv altında buluna.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
