Rusiye kontrolindeki Aqyar yolbaşçısı Mihail Razvojayev «ukruçucısızlarınıñ» ücümi aqqında bildirip, Aqyarda saba olğan patlavlarnı izaatladı.
«Kene ukruçucısızları ücüm ete. Şimdiki vaziyet: deñiz üstünde 2 uçucısız tüşürildi. Quvetlerimiz ve ava mudafaa sistemasınıñ vatsaları ücümni urıp qaytarmağa devam ete», – dep yazdı Razvojayev.
Onıñ aytqanına köre, Rusiyeniñ ava mudafaa sistemasınıñ quvetleri «ücümni urıp qaytarmağa devam ete».
Ukrayına arbiyleri bunı daa izaatlamadı. Razvojayevniñ aytqanlarını mustaqil menbalarda teşkermek imkânsız ola.
Qırım.Aqiqat mühbirleri yerli saatnen saba 5-lerde (Kyivde saba saat dörtlerde) Rusiye arbiy bölükleri olğan rayonlarda bir qaç patlav eşitildi, dep bildirdi. Aqyarnıñ merkezinde saat 05:14-te raketa sesi ve küçlü bir patlav eşitildi, camlar tasırlap başladı. Eñ küçlü patlav saba 6:15-te oldı.
Aqyarda keçken künü de raketağa oşağan küçlü sesler eşitildi. Aqyarnıñ Rusiye yolbaşçısı Mihail Razvojayev Telegram kanalında «ava mudafaa sisteması vastalarınıñ talimleri» ve «atış vazifeleriniñ yerine ketirilüvi» dep añlattı.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
