Aqyar ve Qırımnıñ şimaliy-ğarbinde Aqmeçit qasabasınıñ sakinleri küçlü patlavlar aqqında haber ete, dep yaza Rusiye ve Qırım Telegram kanalları.
«Krımskiy veter» Telegram kanalı Aqmeçit rayonında raketalar, Aqyarnıñ Cenübiy körfezinde tuman aqqında haber ete. «ÇP Sevastopol» ve diger Telegram kanalları Aqyarnıñ Belbek arbiy uçaq alanı ve Şimaliy tarafında patlavlar aqqında bildirdiler.
Rusiye kontrolindeki Aqyar yolbaşçısı Mihail Razvojayev «Duvanköy (Verhnesadovoye) ve Kaçada ava mudafaa sistemasınıñ işi aqqında bildirdi, ilk malümatqa köre, uçucısızlar urıp tüşürildi». Bu malümatnı mustaqil menbalarda tasdıqlamaq imkânsız ola.
Ukrayına ve Rusiye arbiyleri vaziyetni şimdilik izaatlamay.
Rusiye İç işler nazirliginiñ spikeri Mariya Zaharova Qırımğa darbe endirilse, «tez ve sert cevap berilecek», dep ayttı.
Ukrayına prezidenti ofisiniñ yolbaşçısı Mıhaylo Podolâk bildirgenine köre, Ukrayına arbiyleri Qırım ve Aqyarğa ücüm etip, Qırım yarımadasını işğalden qurtaruvnıñ ilk azırlığını yapa.
Sentâbrniñ 15-ne keçer gecesi Qırım kene uçucısızlarnıñ ücümine oğradı. Rusiye Mudafaa nazirligi Qırımnıñ ğarbiy, şimaliy-ğarbiy ve şarqiy taraflarında altı «Ukrayına» uçucısızı urıp tüşürildi, dep bildire.
Sentâbrniñ 14-nde saba Kezlev yaqınlarında patlavlar oldı. Ukrayına telükesizlik hızmetindeki menbalar Azatlıq Radiosına bildirgenine köre, «mahsus operatsiya» keçirildi, neticesinde 1,2 milliard dollarlıkh «Triumf» Rusiye kompleksi yoq etildi. Operatsiyanı Ukrayına telükesizlik hızmeti Ukrayına Arbiy deñiz quvetlerinen beraber kerçekleştirdi.
Ukrayına Silâlı quvetleri Kezlev yaqınlarında «topraq-ava» Rusiye raketa komleksi yerine darbe endirilgenini tasdıqladı.
Sentâbrniñ 13-nde saba Rusiye Mudafaa nazirligi Aqyarğa qarşı gece ücümi neticesinde eki Rusiye gemisi zarar kördi, dep bildirdi. Bu malümatnı Ukrayina Mudafaa nazirliginiñ Baş İstihbarat idaresiniñ temsilcisi Andriy Yusov tasdıqladı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Rusiye kütleviy haber vastaları, hususan Baza Telegram kanalı menbalarına esaslanıp, Aqyarğa qarşı ücüm neticesinde «Minsk» desant gemisi ve «Rostov-na-Donu» dizel-elektrik suvaltı qayığı zarar kördi, dep bildireler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
