Rusiye Qara deñiz flotunıñ Aqyardaki ştabına ücüm neticesinde eñ az doquz kişi ölge ve on altı kişi yaralanğan. Olarnıñ arasında Rusiye generalları da bar. Bunı Ukrayina Baş istihbarat idaresiniñ yolbaşçısı Kırılo Budanovğa atıf etip "Amerika Sesi"niñ Ukrayinadaki hızmeti bildire.
"Yaralanğanlar arasında general polkovnik [Aleksandr] Romançuk, onıñ vaziyeti pek fena. Ştabnıñ yolbaşçısı general-leytenant [Oleg] Tsekov, bayğındır. Yaralanğan adiy askerlerniñ tam sayısı daa belli degil. Bular hızmette olğan, imaye etken askerlerdir, menim aytqanım cedvelge olar kirmeyler", - dep qayd etti o.
Aynı zamanda Budanov RF Qara deñiz flotunıñ kamandanı admiral Viktor Sokolovnıñ ölümi aqqında bildirmelerni tasdıqladı. Onıñ vaziyeti aqqında istihbaratta malümat yoq.
Sentâbrniñ 22-nde kündüz işğal altındaki Aqyarda bir qaç patlav aqqında haber etildi. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına raketa darbesi endirildi, dep haber etti.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketa urıp tüşürgen, dep bildirdi. Aynı vaqıtta içtimaiy ağlarda darbe neticesinde altı kişi yaralandı, dep yazalar. Bu malümatnı tasdıqlaycaq resmiy bir delil yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
