Aqyarnıñ merkezinde ava mudafaa sistemasınıñ işine oşağan sesler eşitildi, dep haber ete Qırım.Aqiqat mühbiri. Rusiye kontrolindeki Aqyar yolbaşçısı Mihail Razvojayev uçucısızlarnıñ ücümi aqqında bildirdi. Onıñ aytqanına köre, Qara deñiz flotu ve Rusiye Federatsiyasınıñ ava mudafaa sisteması uçucısızlardan birini urıp tüşürdi.
«Flot quvetleri ava mudafaa sistemasınen beraber tış reydde duşman uçucısızlarınıñ ücümini urıp qaytara. Bir uçucısız endi tüşürildi. Şeerniñ bütün hızmetleri azır buluna. Raat qalamız», – dep yazdı Razvojayev Telegram kanalında.
Bundan ğayrı, yerli pablikler uçucısızlardan biri Aqyarnıñ Nahimov rayonındaki Mamaşay (Orlovka) köyünde urıp tüşürildi.
Bundan evel Rusiye Federatsiyasınıñ ava mudafaa sistemasınıñ Kezlevdeki Yalı Moynaq (Zaozernoye) qasabasında çalışqanı haber etildi.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Bundan evel, aprelniñ 24-ne keçer gecesi, Qırım.Aqiqat mühbirleri Aqyardaki patlavlar aqqında bildirdi. Olarnıñ aytqanına köre, patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitildi. Zenit topu ve atıcı silâ ateşleri de eşitildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayıina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
