Rusiye kontrolindeki Aqyar şeer mahkemesi Aqyarnıñ 39 yaşında qadın sakinini “devlet hainligi” ve “vandallıqta” qabaatlap, 13 yıl koloniyada qalmasına üküm etti. Bu aqta Rusiye qurğan şeer prokuraturası haber ete.
Berilgen malümatqa köre, qadın Ukrayina Mudafaa nazirligi Baş istihbarat idaresinen işbirligi yapıp, 2023 senesi aprel ayından başlap noyabr ayına qadar Aqyarda Rusiye arbiy obyektleriniñ bulunğan yerleri, arbiy gemi ve aviatsiyanıñ areketleri aqqında malümat topladı. Bundan ğayrı, Rusiye uquq qoruyıcıları Anna Ahmatova parkında soqaq skemlelerinde ve abadanlaştıruv obyektlerinde “Rusiyege nefret duyğularını yazğan”. Tam olaraq ne yazıldı – aytılmay. Rusiye uquq qoruyıcılarınıñ malümatını cenk vaziyetinde teşkermek imkânsız ola.
Mahküm etilgen qadınnıñ adı ve soyadı aytılmay, ükümnen bağlı izaatları seslendirilmey. Ukrayina Mudafaa nazirligi Baş istihbarat idaresi bu haberni izaatlamadı.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
