Rusiye nazaretinde olğan Aqyar şeeriniñ Lenino rayon mahkemesi, avgustnıñ 17-nde Rusiye quvetçileri tarafından tintüvlerden soñ yaqalağan faal Zaur Abdullayevniñ tevqif müddetini dört ayğa devam etti.
Bunı «Qırım birdemligi» cemaat birleşmesi advokat Aleksey Ladinge atfı etip bildirdi.
Advokatnıñ sözlerine köre, qabaatlav tarafı, mahkemelengen "şaatlarnı tehdit ete bileceginde ve Ukraina vatandaşı olğanı içün gizlene bileceginde" turdı ve onıñ tevqifli qaldırılmasını talap etti.
Mhkeme qabaatlav tarafınıñ delillerine razı olıp, Abdullayevniñ tevqif müddetini 2021 senesi yanvarnıñ 22-nedej uzatttı.
Evel, Rusiyeniñ nezaretinde olğan Aqyar şeer mahkemesi, avgustnıñ 17-nde Rusiye quvetçileri tarafından tintüvlerden soñ yaqalağan faal Zaur Abdullayevniñ tevqif etilmesine dair evelki mahkeme qararına berilgen istinaf şikâyetini red etti.
Hatırlatamız, avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp bildirgenine köre, tutulğan qırımtatarlar «terror teşkilâtını qurğanından ve iştirak etkeninde» şübhelene.
Ukraina ombudsmanı Lüdmila Denisova avgustnıñ 17-nde tintüvlerden soñ tutulğan qırımtatarlarğa çıqarılğan qararnı «qanunsız» dep saya.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
