Rusiyeniñ nezaretinde olğan Aqyar şeer mahkemesi, avgustnıñ 17-nde Rusiye quvetçileri tarafından tintüvlerden soñ yaqalağan faal Zaur Abdullayevniñ tevqif etilmesine dair evelki mahkeme qararına berilgen istinaf şikâyetini red etti.
Bunı «Qırım birdemligi» cemaat birleşmesi advokat Aleksey Ladinge atfı etip bildire.
«Böyle olacağını bile edik - Zaur tahqiqat tevqifhanesinde qalacaq. Qadı, RF Ceza ve usul qanunnamesine riayet etmeyip, istinaf şikâyetini tez-tez ve şekliy olaraq baqmağa tırıştı», – dedi Ladin.
Aynı zamanda, advokatnıñ bildirgenine köre, mahkeme oturışı vaqtında mahkemelengen oturışı olacağı aqqında evelden haberdar etilmegeni belli olğam. Advokat, Rusiyeniñ nezaretinde olğan Lenino rayon mahkemesiniñ talabınıñ yerine ketirilmesini talap etken – Abdullayev davanıñ baqıluvında keregi kibi iştirak etip olması içün oña şikâyetniñ kopiyasını yollamaq. Reislik yapqan qadı sebepleri añlatmayıp, arizanı red etken.
Bunda ğarı, Ladinniñ qayd etkeni kibi, Zaur Abdullayevniñ bir sıra sürekli hastalığı bar eken.
Hatırlatamız, avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp bildirgenine köre, tutulğan qırımtatarlar «terror teşkilâtını qurğanından ve iştirak etkeninde» şübhelene.
Ukraina ombudsmanı Lüdmila Denisova avgustnıñ 17-nde tintüvlerden soñ tutulğan qırımtatarlarğa çıqarılğan qararnı «qanunsız» dep saya.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
Advokat Edem Semedlâyev avgustnıñ 17-nde Aqmescit rayonınıñ Mamaq (Stroganovka) köyünde yerli imam Raif Fevziyevniñ evinde keçirilgen tintüv aqqında bildirdi. Advokat tintüvge kirsetilmedi. İmam 205.5 maddege istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – QA) qabaatlana.
Faaller Aqyarnıñ Balıqlava rayonındaki Eski Şüli (Ternovka) köyünde Cebbar Bekirov, Bağçasaray rayonınıñ Zalanköy (Holmovka) köyünde Zaur Abdullayev, Aqyarnıñ Nahimov rayonındaki Belbek (Fruktovoye) köyünde Rustem Murasov, Aqyarnıñ Nahimov rayonındaki Povorotnoye köyünde Rustem Tairovnıñ evinde keçirilgen tintüvler aqqında bildirdi.
Qırım Muhtar Cumhuriyeti ve Aqyar prokuraturası yañı tintüvler ve qırımtatarlarnıñ tutuluvınen bağlı cinaiy tahqiqat başlattı.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
