Rusiyeniñ Mariy El koloniyasında apis cezasını çekken Aqyardaki «Hizb ut-Tahrir davasınıñ» mabüsi Nuri Primov kene ceza izolâtorına qapatıldı.
Advokat Emil Kurbedinovnıñ Qırım.Aqiqat mühbirine bildirgenine köre, bu 2019 senesi noyabrniñ 18-nde olğan mahkemeden soñ oldı. Bu oturışuvda Primov azatlıqqa çıqqan soñ sekiz yıl memuriy nezaret altında qalacaq, dep qarar çıqarıldı.
«Alğan malümatıma köre, mahkemeden soñ kartserde otura. O oturışuvda halqara uquq aqqında ayttı, aytqanlarını protokolda qayd etmege talap etti, mahkemeni çetleştirmege talap etti. Ve, bilgenime köre, mahkemede çoq laf etkeni içün kartserge oğradı. Ne qadar qalacaq bilmeyim, amma tünevin (dekabrniñ 1-nde – QA) daa anda edi», – dep qayd etti Emil Kurbedinov.
Advokatnıñ aytqanına köre, Primovnıñ ceza izolâtorına qapatıluvı tezden apisten çıqacağınen bağlı ola bile.
«Soñki aylar – eñ zor, qoranta içün de öyle. Koloniya hadimleri bunı añlay. Şu sebepten izolâtorğa ciddi y bir sebepten degil, soñuna qadar baqışlarını qoruğanı içün oğray», – dedi Kurbedinov.
Koloniya vekilleri Emil Kurbedinovnıñ aytqanlarını izaatlamadı. Mariy El cumhuriyetiniñ Cezalarnı yerine ketirüv federal hızmeti idaresiniñ saytında da bir malümat yoq.
2019 senesi yanvarniñ 24-nde Nuri Primovnıñ Rusiye koloniyasında bulunuv müddeti bite.
Nuri Primovnıñ anası Raime Primova Rusiye apishanesinde oğlu muntazam sürette ceza izolâtorına qapatıla, dep bildirgen edi.
2017 senesi sentâbr ayında Rostov-na-Donudaki Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davasınıñ» aqyarlı mabüsleri Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
2018 senesi iyünniñ 20-nde Qırımda 68 yaşında Raime Primova açlıq ilân etti. O, Rusiye mahküm etken oğlunı almaştıruv cedveline kirsetmege talap etti. Narazılıq vaqtında onı hastahanege alıp ketkenler. Daa soñra Raime Primova açlığını toqtattı.
Keçken sene dekabr ayında Rusiyeniñ Mariy El cumhuriyetiniñ Sovet rayon mahkemesiniñ qadısı Yelena Yakimova Nuri Primovnı şartlı olaraq vaqtından evel azat etmege razı olmadı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
