Aqyardaki «Hizb ut-Tahrir davası» boyunca mahküm etilgen Nuri Primov 8 yıl memuriy nezaret altında qalacaq, dep bildire «Qırım birdemligi» cemaat birleşmesi Facebookta.
«2019 senesi noyabrniñ 18-nde Mariy El Cumhuriyetiniñ Sovet rayon mahkeme binasında Aqyardaki «Hizb ut-Tahrir davasınıñ» mabüsi Nuri Primovnıñ azatlıqtan marum etüv müddeti yekünlengeninen bağlı oturışuv oldı. Apis cezası 2020 senesi fevralde bite. Mahkeme oturışuvı neticesinde Primovğa nisbeten 8 yıllıq memuriy nezaret qararı çıqarıldı», – dep aytıla haberde.
Advokat Edem Semedlâyevniñ aytqanına köre, memuriy nezaret ağır ya da pek ağır qabaatı içün mahkümiyeti bitmegen ya da qalğan çağına ketken ve azat etilgen şahısqa belgilene.
«Oğlanlarnıñ «cinayetleri» pek ağır ola da, olarnı memuriy nezaret altına da alalar. Memuriy nezaret müddeti mahkümiyet bitecek müddetten az olamaz. Terror davaları boyunca mahkümiyet bitken müddet 8 yıl ola. Şu sebepten mahkeme Nuri Primovğa nisbeten 8 yıl memuriy nezaret qararını çıqardı», – dep añlattı advokat.
Onıñ aytqanına köre, Primovnı bir sıra sıñırlavlar beklemekte: saat 22:00-dan saba 06:00-ğa qadar evde olmaq, ilhaq etilgen Qırımnı ya da şeerni (mahkeme nasıl qarar alsa) terk etmemek, ayda eki kere mahkemede qayd olmaq kerek.
«Memuriy nezaret yaqın vaqıtta azatlıqqa çıqmağa azırlanğan Vaitov Rustemge ve Ferat Sayfullayevge de berilecek, dep tüşünem», – dep ayttı Semedlâyev.
2017 senesi sentâbr ayında Rostov-na-Donudaki Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davasınıñ» aqyarlı mabüsleri Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
2018 senesi iyünniñ 20-nde Qırımda 68 yaşında Raime Primova açlıq ilân etti. O, Rusiye mahküm etken oğlunı almaştıruv cedveline kirsetmege talap etti. Narazılıq vaqtında onı hastahanege alıp ketkenler. Daa soñra Raime Primova açlığını toqtattı.
Keçken sene dekabr ayında Rusiyeniñ Mariy El cumhuriyetiniñ Sovet rayon mahkemesiniñ qadısı Yelena Yakimova Nuri Primovnı şartlı olaraq vaqtından evel azat etmege razı olmadı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
