Aqyardaki cermay bazasına uçucısızlar ücüm etken soñ işğal etilgen Qırımda telâş lafları tarqala, dep haber ete Ukrayına Silâlı quvetleriniñ Baş ştabı.
«Tünevin Kazaçya körfezinde olğan büyük yanğında 10 neft mahsulatı rezervuarı yoq etildi, umumen tahminen 40 biñ tonnalıq. Şu sebepten şeerde Rusiye ava mudafaa sisteması strategik obyektleriniñ telükesizligini temin etip olamay degen öşekler peyda oldı», – dep aytıla Baş ştabnıñ haberinde.
Ukrayına komandanlığı qayd etkenine köre, Rusiye arbiyleri «vaqtınca işğal etilgen Qırımda «sıcaq bir kurort mevsimi» başlanğanını is etip», tatil izni arizalarını berip başladı. Qayd etilgenine köre, arbiyler tatilini «esas Rusiyede» keçirmege istey.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Qırımda olğan Rusiye senatorı Olga Kovitidi Odesağa darbe endirilmesini talap etti. Onıñ aytqanına köre, artıq «yavaş oyun» vaqtı degil, «sert cevap berilmeli ve areket etilmeli».
Qırımnıñ Rusiye yolbaşçısı Sergey Aksenovnıñ aytqanına köre, yarımadada ava mudafaa quvetleri bir uçucısıznı urıp tüşürdi, daa bir uçucısız radioelektron küreş vastalarınen bastırıldı.
Ukrayına Mudafaa nazirliginiñ Baş istihbarat idaresi yanğın neticesinde neft mahsulatları olğan 10-dan çoq rezervuar yoq etildi, dep bildirdi. Olar Rusiye Qara deñiz flotunıñ ihtiyacları içün qullanılacaq edi, dep aytıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
