Aqyarnı tatlı suvnen temin etmek içün Belbek özeninde suv aluv yapısınıñ quruluvı 2021 senesi fevralnıñ soñunace yekünlenecek. Bunıñ Rusiye Mudafaa nazirligi haber etti. Yarımadağa kelip çıqqan idare başınıñ muavini Timur İvanov, suv aluv yapısınıñ 80 faizi azır, dep bildirdi.
“Butün işler 2021 sennsi martnıñ 1-nece yekünlenecek. Obyektniñ işletilmesi Aqyarnı künde 50 biñ metr kub tatlı suvnen temin etmege yardım etecek”, – “İnterfaks” agentligi nazirlikniñ malümatından alıntı ketire.
İvanovnıñ bildirgenine köre, iş üç nevbette gece-kündüz yapıla.
“450 kişi çalışa, 160 dane tehnika. Obyektniñ 80 faizi azır, dep qıymet kesemiz. İşler cedvelge köre yapıla”, – dedi İvanov.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
