Aqyarda sağanaqlar sebebinden stansiyalardan biri söndürildi, neticede bir qaç qasaba elektriksiz qaldı, dep bildire Aqyarnıñ Rusiye yolbaşçısı Mihail Razvojayev öz telegram kanalında.
''Şimdiki vaziyet: suv basuvı sebebinden 18 ast stantsiyası söndürildi. Tahminen saat 18-ge qadar elektriksiz qalğan meskün yerler: Hmelnitskoye, Saharnaya golovka, Ternovka, Çernoreçye, Rodnoye'', - dep yazdı Razvjayev.
Bundan da ğayrı, Razvojayevniñ yazğanına köre, şeerde yerli vaqıtqa köre saat 12:30-ta suv berilmesi toqtatılacaq, çünki 3 gidrouzelge kirli suv kelecek, şunıñ içün sakinlerge sanitar ihtiyacları içün yedek tutmağa tevsiye etile.
Yanvarniñ 19-nda gece Aqyarnı sağanaq bastı, etraftaki köylerde eñ az 25 evni suv bastı, 19 adam tahliye etildi.
Rusiye Fevqulâde vaziyetler nazirligi Qırım yarımadasında küçlü yağmurlar yağması sebebinden furtuna havfı ilân etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
