Aqyarda martnıñ 18-i Qırım yarımada ilhaqınıñ beş yılı munasebetinen qoşma tatil olaraq ilân etildi, dep bildirdi şeerniñ Rusiye yolbaşçısı Dmitriy Ovsânnikov, dep haber ete TASS.
Ovsânnikovnıñ bildirgenine köre, şeer ükümetiniñ memurları, ilk evelâ – şeerniñ vaziyeti ve telükesizliginden mesüliyetli olğanlar içün bu kün iş künü olacaq, çünki akimiyet «bayram tedbirleriniñ» keçirilmesini temin etmeli.
Ovsânnikovnıñ qayd etkenine köre, «qalğan afta devamında şeerni avağa baqmadan azırlamaq kerek». Haber etilgenine köre, ilhaqqa bağışlanğan tedbirler martnıñ 18-nde ve bir qaç kün ögüne keçirilecek.
Bundan evel «Grajdanskiy ştab v podderjku Putina» cemaat areketiniñ keñeş reisi Aleksandr Sinâvskiy bildirdi ki, martnıñ 16-nda Aqmescit-Aqyar avtoyürüşiniñ keçirilmesi ve Aqyardaki Gasforta dağında «Noçnıye volki» motoklubınıñ meydanında «samooborona» vekilleri, qazaq ve «opolçenlerniñ» qarşılanması beklenile.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
