Aqyarda COVID-19 diagnozı qoyulğan yañı hasta aqqında haber etile. «RİA Novosti Krım» yazğanına köre, o, aprelniñ 1-nde Moskvadan keldi.
«Aynıñ birinde uçaqnen Aqmescitke keldi, Aqyarğa ketti, 3-nde yaramadı, 7-nde ise keskin nefes virus yuqunçı alâmetlerinen acele tibbiy yardım brigadası tarafından Daşa Sevastopolskaya №3 şeer hastahanesine ketirildi», – dep bildirdi agentlikke Rusiye kontrolindeki Aqyar ükümetiniñ sağlıq departamentiniñ mübiri Sergey Şehovtsov.
Şeerniñ Rusiye ükümeti agentlikke qayd etkenine köre, «bu Aqyar sakini şeerde izolâtsiya rejimi ilân etilgenine baqmadan, Moskvağa tibbiy hızmet almaq içün barıp keldi».
Berilgen malümatqa köre, bu hasta ve onıñnen aynı uçaqnen ketken insan Aqyarnıñ yuqunç hastahanesine alındı. Birinci hastanıñ yanında olğan daa eki kişi hastahanege alınmalı. Olardan biri – esli-başlı adam, onıñ pnevmoniya alâmetleri bar. Tasdıqlanğan diagnoz Moskvadan eñ yaqın vaqıtta kelip, dep yaza agentlik.
Bunı Aqyarnıñ Rusiye valisi vazifelerini vaqtınca eda etken Mihail Razvojayevniñ malümatına esaslanıp «Novıy Sevastopol» neşiri de bildire.
Aqyarnıñ Rusiye ükümetiniñ resmiy saytında yañı koronavirus hastası aqqında malümat şimdilik yoq.
Daa evel Aqyarda koronavirusqa oğrağan beş kişi aqqında haber etilgen edi, dördü tüzeldi. Aqyarda koronavirusnen hastalanğanlardan biri ağır alda buluna, pnevmoniyası başlandı. Aprelniñ 9-nda saba 584 insan yaşağan yerinde közetüv altında qala.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
