Aqyar şeerinde Rusiye uquq qoruyıcıları ve Ukrayinağa qarşı cenk iştirakçileriniñ balaları içün mahsus mektep açıldı. Bu aqta «Sarı şerit» tirenüv areketiniñ faalleri bildirdi.
Berilgen malümatqa köre, mektep biñ talebege yapıldı, onıñ yanında rus medeniyet merkezi ve yañı oquv yurtu içün kadetlerni azırlağan «sotsial klaster» qurula.
«Sarı şerit» areketiniñ faalleri qayd eteler ki, müessiseniñ qapalı olğanından malümatı sıñırlı.
Muarririyet faallerniñ malümatını tasdıqlap olamay.
Qırımlı aq qorçalayıcılardan biri Qırım.Aqiqatqa izaat berip, Qırımda Rusiye prezidentiniñ Fermanı ile 2025 senesi «Vatan imayecileri yılı» dep ilân etilmesinen bağlı talebelerniñ añını askeriyleştirilüvniñ yañı dalğası başlandı. Onıñ malümatına köre, bu munasebetnen mektep müdirlerine areketler planını tizmek ve onı bir yıl içinde ömürge keçirmek içün emir berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
