Aqyarda yaşağan dairesinde Ukrayına bayrağını asqan mariupolli student Kirill Kolomiyetsni çaqqanlar.
Mariupolli genç taqip etilgenine dair malümat «Sevastopol. SMERŞ» Telegram kanalında peyda oldı. Onı Rusiye tarafdarı qırımlı bloger Aleksandr Talipov qurğan edi.
Rusiye uquq qoruyıcıları tutqan Kolomiyetsniñ «açıq afu sorav» videosında Aqyarğa Mariupolden keldi, dep tarif etti. O, aliy oquv yurtunda oquy, 19 yaşında, dep ayttı. Kolomiyets Ukrayına timsallerini divarda yerleştirdi, dep qayd etti.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
