Aqyarda Rusiye telükesizlik hadimleri ukrayin istihbaratı ile işbirlikte şübeli sayılğan bir adamnı tuttılar. Bu aqta Rusiye kütleviy haber vastaları Rusiye FSB-sı cemaat alâqaları Merkeziniñ malümatına atıf etip yaza.
Qayd etilgenine köre, yaqalanğan kişi Qırım ve Aqyar territoriyasında Rusiye ava mudafaasınıñ yerleşüv yerleri aqqında malümat toplay ve onı telegram vastasınen ukrayin arbiylerine bere edi.
Tutulğan kişiniñ adı ve soyadı bildirilmey. Rusiye FSB-sınıñ hadimleri tarafından çıqarılğan ve Rusiye kütleviy haber vastaları tarqatqan videoda belli bir adam Rusiye quvetçileriniñ versiyasını tekrarlay. Bu malümat basqı altında alınğan ola bile. Cenk şaraitlerinde Rusiye quvetçileriniñ aytqanlarını teşkermek imkânsızdır.
Rusiye mahkemesinde qabaatı isbatlansa, "devlet hainligi" maddesine istinaden (Rusiye Federatsiyası Ceza kodeksiniñ 275-inci maddesi) 20 yıl apis cezası berile bile.
"KrımSOS" aq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diverssiya teşkil etüv ya da zorbalıqqa çağıruvlar şeklinde qabaatlavlar qullanıldı.
