Martnıñ 9-nda Aqyarda yerli sakinler ukrain şairi, yazıcısı ve ressamı Taras Şevçenkonıñ doğğanından 208-nci yıldönümini qayd etkenler. Kobzarnıñ abidesine çiçekler, çıraqlar ve cenk aqqında şiirler ketirgenler. Bunı Qırım.Aqiqat mühbiri haber etti.
Adamlar Ukraina bayrağınıñ renklerinde sarı küstüm otu, mavı susamlar ve aqbardaqlar ketirgenler. Aqyar sakinleri öz isteginen kün devamında çiçekler taşığanlar. Abideniñ yanında Rusiyeniñ Ukrainağa silâlı ücümi zamanı elâk olğanlarnıñ hatırasına çıraq yaqqanlar. Qadınlar Şevçenko abidesi yanında dua oquğanlar. Abide yanında çiçeklerden ğayrı, Rusiyeniñ Ukrainada başlatqan arbiy areketleriniñ faciası aqqında tarif etken bir kâğıt qaldırğanlar.
Aqyarnıñ Rusiye akimiyeti Şevçenkonıñ doğğan künü munasebeti ile tedbirlerniñ keçirilmesiniñ teşebbüsçisi olmağan.
Taras Şevçenko 1814 senesi martnıñ 9-nda doğdı. O, Ukraina medeniyetiniñ eñ büyük timsallerinden biridir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
