Aqyarda 18 yaşında studentke qarşı internette yazğan izaatları içün «Rusiye ordusını itibardan tüşürüv» maddesine istinaden memuriy protokol tizildi. Bu aqta Aqyardaki Rusiye İç işler nazirliginiñ matbuat hızmeti haber ete.
«Serbest irişimde olğan izaatçınıñ lafları Rusiye Federatsiyası Silâlı quvetlerini itibardan tüşürdi. Keçirilgen tedbirler neticesinde uquq qoruyıcılar müellifniñ kim olğanını bildi. Bu Qırım Cumhuriyetinden oqumağa kelgen 18 yaşında student çıqtı», – dep aytıla müessise haberinde.
Müessise haber etkenine köre, tutulğanğa qarşı malümat Rusiye kontrolindeki Nahimov rayon mahkemesine Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden («Rusiye ordusını itibardan tüşürüv») dava baqıluvına berilecek. Tutulğannıñ adı ve soyadı aytılmay.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
