Mayısnıñ 8-nde saba Aqyarda sekiz yañı COVID-19 hastası qayd etildi. Hastalar arasında Omegadaki Rusiye arbiy gospitaliniñ üç qurucısı bar. Olar arbiy observatorda olıp, hastalarnen alâqada oldı, dep bildire Rusiye kontrolindeki Aqyar ükümetiniñ saytı.
«Ketirilgen daa beş hasta qayd etildi – üç kişi şeerge Bağçasaraydan qayttı, Yunanistandan kelgen erkek ve Moskvadan kelgen qadın bar. Episi evde izolâtsiyada bulunğan edi», – dep bildire akimiyet.
Qayd etilgenine köre, yılnıñ başından berli Aqyarda 118 yañı koronavirus hastası qayd etildi. Soñki künde eki hasta hastahaneden çıqarıldı; regionda 18 insan tüzeldi, 2 kişi vefat etti.
Akimiyetniñ malümatına köre, bugünki künde 142 insan yuqunç hastahanesinde közetüv altında buluna, №9 hastahanesinde – 103 kişi. 1140 kişi yaşağan yerinde közetüv altında qala.
Keçken künü Qırımda doquz yañı koronavirus hastası qayd etildi. Umumen Qırımda 177 koronavirus hastası bar. 44 insan tüzeldi, bir hasta koronavirustan can berdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
