Aqyarda dekabrniñ 7-nde sabadan berli patlav, top atışları ve reaktiv bomba atıcılarğa oşağan küçlü sesler eşitile, dep haber ete Qırım.Aqiqat mühbiri.
Berilgen malümatqa köre, yerli saatnen 7:36-da Aqyarnıñ merkezinde reaktiv bomba atıcılarğa oşağan sesler eşitildi. Mühbir saat 10:44-te patlav ve top atışlarına oşağan eñ az 20 ses keldi, dep bildirdi.
Rusiye akimiyeti ve arbiyleri vaziyetni daa izaatlamadı. Saat 11:13-te Aqyarnıñ Rusiye kontrolindeki yolbaşçısı Mihail Razvojayev Rusiye arbiyleri Kazaçya körfezinde saat 14:00-ge qadar devam etecek talimler keçire, dep bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
