Aqyarda dekabrniñ 30-nda yerli vaqıt ile saat 9:44-te Aqyarnıñ merkeziy qısmında küçlü patlav eşitildi, dep bildire Qırım.Aqiqat mühbiri.
Onıñ aytqanına köre, patlav neticesinde evlerniñ pencereleri titredi. Rusiye akimiyeti ve Rusiye arbiyleri başta vaziyetni izaatlamadı, amma soñra Rusiye Mudafaa nazirligi Qırım yarımadasına ekipajsız katerniñ ücüm etkeni aqqında bildirdi. Müessisede qayd etkenlerine köre, ukrayin deñiz uçucısız uçağı yerli vaqıt ile saat 10:00 Rusiye Federatsiyasınıñ Qara deñiz flotunıñ patrul katerinen yoq etildi.
Rusiye kontrolindeki Aqyar yolbaşçısı Mihail Razvojayev Rusiye arbiylerine atıf etip, deñiz dronu şeerden üç kilometr uzaqlığında vertolöt yardımınen yoq etilgenini bildirdi.
Rusiye akimiyetiniñ ve RF arbiyleriniñ beyanatlarını mustaqil menbalarnıñ yardımı ile tasdıqlamaq mümkün degil. Ukrayina tarafı bu malümatnı izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
