Aqyarda "Bereket künü" ukrayin küz bayramı keçirildi. Tedbirni yerli Ukrayina milliy-medeniy cemiyetiniñ faalleri teşkil etti.
Tedbirni Aqyarnıñ merkezinde keçirdiler. Milliy bezler ile yaraştırılğan sofra başında ukrayin ananeleriniñ mühlisleri toplaştı. Olar tabiat, bereket, emekke bağışlanğan türküler yırladı ve şiirler oqudı.
"Juravki" vokal duetiniñ artistleri ukrayin tilinde türküler yırladı.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Şu cümleden, keçenlerde RF nezareti astında olğan Qırımnıñ Lenino rayon mahkemesi yeri sakinler Lenur Halilov ve Dmitriy Kamışantsevge Rusiye ordusını "itibardan tüşürüv" içün 40 biñ ruble para cezasını tayin etkeni belli oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
