Aqyarda saban ayınıñ 31-nde saba şeerniñ rusiyeli müessiseleriniñ elektron poçtalarına binalarğa minalar qoyulğanı aqqında mektüpler keldi. Bu aqta Rusiye kontrolindeki Aqyar yolbaşçısı Mihail Razvojayev bildirdi.
"Bugün Aqyar ükümetiniñ, tasil, sağlıq saqlav, medeniyet ve Aqyarnıñ diger resmiy müessiseleriniñ elektron poçtalarına minalar aqqında mektüpler kele. Mahsus hızmetler bütün kerekli talimatlarğa köre teşkerüv keçire", — dep yazdı Razvojayev öz telegram kanalında.
O, Ukrayina mahsus hızmetlerini bu beyanatlarnıñ tarqatılmasında qabaatladı, onıñ fikrince, olar böyleliknen "panika yaratmağa ve devlet müessiseleriniñ işini qıyınlaştırmağa" tırışa. Ukrayin tarafı Razvojayevniñ bildirüvini izaatlamadı.
Saban ayınıñ 12-nde işğal etilgen Aqyarda bir sıra müessise minalar aqqında haberler sebebinden tahliye etildi. O vaqıt 22-nci mektep ve 8-nci gimnaziya talebeleri ve hadimleri çıqarıldı. Bundan ğayrı, 4-nci şeer hastahanesi ve Sea Moll ticaret merkezi tahliye etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
