Aqyarda Rusiye mahkemesi yerli sakinni ukrayin istihbaratınen işbirlik yapqanında qabaatlap, 18 yılğa üküm etti. Bu aqta Rusiye kontrolindeki Qırım prokuraturası bildirdi.
Rusiye akimiyetiniñ versiyasına köre, 2024 senesi erkek Ukrayina Mudafaa nazirliginiñ GUR temsilcisi ile bağ qurdı ve "çetel istihbaratına yardım etmege" razı olğan. O, "Sevastopoldeki patlayıcı aletlernen saqlanğan yerlerni qıdırıp, olarnı qayd etilgen yerlerge avuştıruvda" iştirak etkenini aytalar.
Prokurorlıqnıñ bildirgenine köre, FSB adamnı vazifeni yerine ketirmezden evel yaqalanğan. Onı apiske aldılar, qapalı mahkeme oturışuvını keçirdiler ve ceza tayin ettiler: 18 yıl sert rejimli koloniyada, bir buçuq yıl azatlıq sıñırlavı ve 400 biñ ruble miqdarında para cezası.
Rusiye prokuraturası mahküm etilgenniñ adını ve soyadını aydınlatmay, em de onıñ açıq beyanatlarını derc etmey.
Quralaynıñ 15-nde haber etilgenine köre, Rusiye quvetçileri Ukrayina havfsızlıq hızmeti ile işbirliginde şübheli sayılğan eki Aqyar sakinini yaqalağan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
